Терористичко загрозување на уставниот поредок е пријавата против Чавков , Мукоски , Арнаудов и уште 33 уапсени

Триесет и шестмина се гонат за Терористичко загрозување на уставниот поредок и безбедноста, соопшти пред малку Јавното обвинителство.
Основното јавно обвинителство за гонење на организиран криминал и корупција по преземање на сите дејствија за утврдување на фактите во врска со настаните кои се случија на 27 април 2017 година во Собранието на Република Македонија ја заврши предистражната постапка, пишува во соопштението.
По разгледување и анализа на прибраниот доказен материјал, Основното јавно обвинителство за гонење на организиран криминал и корупција донесе Наредба за спроведување на истражна постапка против триесет и шест лица поради основано сомнение за сторено кривично дело Терористичко загрозување на уставниот поредок и безбедноста од член 313 од Кривичниот законик.