Лекар од Куманово утрово донираше крвна плазма за болен од ковид 19 од Ресен, кој се лекува во Градската општа болница (ГОБ) „ 8 Септември“ , за кој деновиве по социјалните мрежи се споделуваше пост од неговата сопруга која бараше помош.
Утрово на Клиниката за трансфузиологија дарував крвна плазма, а попладневмо ме известија дека е обработена и пратена во 8 Септември. Се надевам дека ќе му помогне на пациентот од Ресен. Донирав не само затоа што сум лекар, туку и затоа што треба да бидеме хумани и секој ако може да помогне“, вели д-р Мирослав Бошковски за ДОСИЕ.МК, кој работи како матичен лекар во Куманово и специјализира интерна медицина.
Тој раскажува дека бил меѓу првите заболени од Ковид 19 од Куманово и дека откако неговото лекување било успешно, се пријавил на повикот а Министерството за здравство да дарува крв.
Сопругот се бори со вирусот итно му треба крвна плазма од оздравен пациент
Вчера и на социјалните мрежи видов дека се споделува апелот од сопругата на пациентот од Ресен дека се бара крвна плазма со мојата крвна група, но и д-р Калина Гривчева Старделова, претседателката на Лекарска комора, каде и јас сум член ми ги препрати апелот и јас се јавив да донирам. Откако ми ги направија потребните испитувања за дарување и уште еднаш се потврди негативен тест на вирусот утрово бев да донирам, вели д-р Бошковски.
Тој неговото лекување од крајот на март до средината на април го минал на инфективното одделение во болницата во Куманово.
Бев со средно тешка клиничка слика. Се плашев и за себе , но и за моето семејство. Имам повозрасни родители, кои исто така беа заболени. За среќа и јас и тие сме добро и секој кој може да помогне треба тоа да го направи, вели д-р Бошковски.
Р.Д.
