Првата детска амбасада во светот Меѓаши апелира до Владата да ги преиспита одлуките поврзани со враќањето на работа на родителите на деца до 10 годишна возраст и враќањето на работа  на мајките ослободени од работа врз основа на користење на продолжено породилно отсуство.

„Во услови кога сè уште не се јасни начините како ќе се продолжи образовниот процес, бројките на заразени случаи сè уште немаат тренд на опаѓање, изменети услови на учење без разлика на изборот – со физичко присуство или онлајн, сметаме дека одлуката е неконзистентна со претходните одлуки и премногу е краток рокот за да им се овозможи на родителите соодветно да се организираат“, велат од Меѓаши.

Тие тврдат дека на децата на училишна возраст, особено на првачињата им е неопходно присуство на еден родител и во случај на онлајн настава, и во случај на посета на наставата со физичко присуство.

„Со оглед на најавеното скратено времетраење на часовите децата ќе поминуваат значително помалку време на училиште и поради работниот ангажман на своите родители може да се најдат во ситуација сами да поминуваат повеќе саати во своите домови, се до враќањето на нивните родители“, велат од амбасадата.

Според Меѓаши, нема решение од владата за континуирана и квалитетна грижа за децата, безбедноста, менталното здравје и нивната благосостојба и предупредуваат и дека стресот предизвикан кај родителите со оваа нагла одлука со рок на спроведување од една седмица ќе има последици врз севкупниот семеен живот што пак ќе се одрази повторно на децата.