Судови

Притвор за разбојникот кој во Прилеп ограби пошта и го повреди вработениот


По поднесена кривична пријава од Министерството за внатрешни работи против едно лице од Прилеп, на возраст од 35 години, Основното јавно обвинителство Прилеп донесе Наредба за спроведување истражна постапка за сторено кривично дело Разбојништо од член 237 став 4 во врска со став 1 од Кривичниот законик

Осомничениот на ден 13.12.2018 година, во претпладневните часови со намера противправно да присвои туѓи подвижни предмети, со употреба на сила и опасно орудие-безбол палка одзел парични средства во износ од 35.460 денари од пошта сопственост на оштетеното АД за поштенски сообраќај „Македонска Пошта” во државна сопственост – подружница Прилеп. Осомничениот маскиран со качунка на главата влегол во поштата држејќи во рацете дрвена безбол палка му се заканил на вработениот-оштетениот дека непосредно ќе нападне врз неговиот живот и тело, па подавајќи му хартиена кеса му рекол да му ги предаде парите што биле во касата. Потоа осомниченото лице со безбол палката го скршил шалтерското стакло кое се распрскало на парчиња и едно од стаклените парчиња удрило во лицето и десното око на оштетениот, со умисла нанесувајќи му тешка телесна повреда, со што го сторил кривично дело Разбојништво.

Надлежниот јавен обвинител поднесе предлог за определување на мерка притвор до судијата на претходна постапка при Основниот суд во Прилеп, по кој предлог судијата на претходна постапка донесе решение со кое на осомничениот му определи мерка притвор во траење до 30 дена.​

соопштение ЈО

Оставете коментар

Вашата адреса за е-пошта нема да биде објавена. Задолжителните полиња се означени со *